O‘zbekistonda yil boshidan buyon 4 milliard kVt/soat "yashil" elektr energiyasi ishlab chiqarildi
O‘zbekiston 2026-yilning besh oyga yetmagan vaqtida quyosh va shamol elektr stansiyalari hisobidan 4 mlrd kVt·soat elektr energiyasi ishlab chiqardi. Energetika vazirligi xabariga ko‘ra, yangi marraga 14-may kuni taxminan soat 18:00 da erishilgan.
Generatsiyaning asosiy hajmini quyosh elektr stansiyalari ta’minlagan bo‘lib, ularning hissasi 2,315 mlrd kVt·soatni tashkil etdi. Yana 1,685 mlrd kVt·soat elektr energiyasini shamol parklari ishlab chiqardi. O‘tgan yilning mos davriga nisbatan “yashil” energiya ishlab chiqarish 898 mln kVt·soatga yoki 29 foizga ortdi.
Qayta tiklanuvchi energetikaning rivojlanishi yil boshidan buyon 1,66 mlrd kub metr tabiiy gazni tejash hamda atmosferaga 2,3 mln tonna ifloslantiruvchi moddalar chiqarilishining oldini olish imkonini berdi.
Ahamiyatlisi, 13-may kuni mamlakatda quyosh va shamol elektr stansiyalarida elektr energiyasi ishlab chiqarish bo‘yicha yangi sutkalik rekord o‘rnatildi. Ular bir kunda 62,4 mln kVt·soat elektr energiyasi ishlab chiqardi, bu umumiy ishlab chiqarish hajmining 29 foizini tashkil etdi. Mazkur ko‘rsatkich 29-aprelda qayd etilgan avvalgi eng yuqori natijadan 10,4 mln kVt·soatga ko‘pdir.
Gidroelektr stansiyalari bilan birga hisoblaganda, sutkalik elektr energiyasi ishlab chiqarishda qayta tiklanuvchi manbalar hissasi 59 foizga yetdi.
