Gimolay energetik ko‘prigi: Hindiston va Butan 1020 MVt quvvatga ega GESni ishga tushirdi

Hindiston va Butan «Punatsangchhu-II» gidroelektr stansiyasini (1020 MVt) foydalanishga topshirdi. Punatsangchhu daryosida qurilgan ushbu rusloviy turdagi stansiya Butanda Hindistonning moliyaviy va texnik ko‘magida barpo etilgan to‘rtinchi yirik gidroenergetika ob’ekti hisoblanadi.

Butan rasmiy ma’lumotlariga ko‘ra, stansiyaning ishga tushirilishi mamlakatning umumiy o‘rnatilgan gidroenergetika quvvatini qariyb 40 foizga oshiradi. Ishlab chiqarilgan elektr energiyasi ichki ehtiyojni qondirishga yo‘naltiriladi, ortiqcha hajmlar esa amaldagi uzoq muddatli kelishuvlar doirasida Hindistonga eksport qilinadi.

Ikki tomon vakillari loyiha toza energetikani rivojlantirishga va mintaqaviy energetik integratsiyani kuchaytirishga xizmat qilishini ta’kidladi. Hindiston, shuningdek, Butandagi kelgusi gidroenergetika va infratuzilma loyihalarini qo‘llab-quvvatlash uchun qariyb 450 million AQSh dollari miqdorida qo‘shimcha kredit liniyasi ajratilishini e’lon qildi. Ushbu mablag‘larning bir qismi quvvati 1200 MVt bo‘lgan «Punatsangchhu-I» GESi qurilishini davom ettirishga yo‘naltiriladi.

Amaldagi hamkorlik modeli doirasida Butandagi GESlar Hindiston tomonidan moliyalashtiriladi va texnik jihatdan qo‘llab-quvvatlanadi, ishlab chiqarilgan elektr energiyasi esa uzoq muddatli shartnomalar asosida Hindiston energetika tizimiga yetkazib beriladi. «Punatsangchhu-II» GESining ishga tushirilishi ikki davlat o‘rtasidagi energetik hamkorlikni mustahkamlaydi va past uglerodli energetikani rivojlantirish maqsadlariga xizmat qiladi.