Xitoy robotlari O‘zbekistondagi quyosh panellarini tozalashda yordam bermoqda
Samarqand viloyatida O‘zbekiston va Xitoy hamkorligida quvvat sig‘imi 220 megavatt bo‘lgan yirik fotoelektr stansiyasi ishga tushirilgan. Bu yerda o‘rnatilgan 456 dona aqlli tozalovchi robotlar har kuni panellarni tozalab, stansiyaning barqaror ishlashini ta’minlamoqda.
Robotlar kunduz kuni yig‘ilgan quyosh energiyasidan foydalanib, kechasi ishlaydi. Ular chang va qorlarni tozalab, elektr ishlab chiqarish samaradorligini oshiradi. Tizim to‘liq avtomatlashtirilgan bo‘lib, atigi ikki nafar operator barcha robotlarni boshqaradi. Natijada yiliga qariyb 12 ming kishining qo‘l mehnati o‘rnini bosmoqda.
Bu texnologiya suvni tejaydi, inson mehnatini kamaytiradi va ayniqsa cho‘l hududlarda samarali hisoblanadi. Shuningdek, robotlardagi sun’iy intellekt ob-havoni prognoz qiladi, qum bo‘ronlari haqida ma’lumot yig‘adi va nosozliklarni oldindan aniqlaydi. Bu so‘nggi ikki yilda kutilmagan nosozliklarni 81 foizga kamaytirishga yordam berdi.
Mazkur stansiya yiliga qariyb 260 ming xonadonni elektr energiyasi bilan ta’minlab, atmosferaga chiqariladigan karbonat angidrid miqdorini 230 ming tonnaga qisqartiradi. Loyiha O‘zbekiston va Xitoy o‘rtasidagi strategik hamkorlikni mustahkamlaydi hamda ShHTning barqaror rivojlanish maqsadlariga to‘liq mos keladi.
Loyiha texnik rahbari Chay Suyxuey ta’kidlaganidek, xitoy texnologiyalari va O‘zbekistonning quyosh resurslari uyg‘unligi mamlakatga ekologik hamda iqtisodiy foyda keltirmoqda. Uning so‘zlariga ko‘ra, bu stansiya ShHT mamlakatlari birgalikda «yashil kelajak» uchun kuchlarini birlashtirishining yorqin namunasi bo‘ldi.
