Shaxmat – intellektual energiya
Shaxmat – bu oddiy o‘yin emas, balki tahliliy fikrlash, strategik yondashuv, tez va samarali yechim topish qobiliyatini rivojlantiradigan intellektual sport turidir. Soʻnggi yillarda Oʻzbekistonda shaxmatga qiziqish kuchaymoqda, bu esa yoshlar va turli soha mutaxassislarining, jumladan energetika xodimlarining intellektual salohiyatini oshirishga yordam beradi.
Bu yo‘nalishda muhim tadbirlardan biri – har yili O‘zbekiston Respublikasi Mustaqillik kuni arafasida o‘tkaziladigan an’anaviy «Uzbekhydroenergo» AJ ochiq shaxmat chempionatidir. Turnir gidroenergetika sohasi xodimlarini birlashtirib, ularga intellektual musobaqa sharoitida o‘z mahorati va mantiqiy fikrlash qobiliyatini namoyish etish imkoniyatini beradi. Janglarda g‘olib deb topilgan ishtirokchilar Jamiyat rahbariyati tomonidan faxriy yorliqlar, pul mukofotlari va qimmatbaho esdalik sovg‘alari bilan taqdirlanadi.
Yuqori intellekt va iste’dodning yorqin namunasi – «Gidroproyekt» AJ «Gidrotexnika» bo‘limining yetakchi arxitektori Ulug‘bek Tursoatov bo'ladi. U ketma-ket uch yil davomida ushbu shaxmat turnirining chempioni bo‘lib kelmoqda va o‘zining yuqori tahliliy qobiliyatlari hamda strategik tafakkuri bilan ajralib turadi. Yosh bo‘lishiga qaramay, Ulug‘bek ushbu sohada katta tajribaga ega.
«Men 2001-yilda shaxmat maktabiga borgan ilk kunimdan, bu sport turiga qiziqib kelaman. Bu mashg‘ulot mening professional shakllanishimda muhim rol o‘ynadi. Shaxmat vaziyatni oldindan koʻra olish, turli yechimlarni tahlil qilish va samarali qarorlar qabul qilish qobiliyatini rivojlantirdi. Bu ko‘nikmalar mening faoliyatimda, ayniqsa, gidrotexnik inshootlarni loyihalashda juda muhim, chunki bu jarayonda ko‘plab omillarni hisobga olish va optimal yechim topish zarur.
Har yili o‘tkaziladigan Ochiq shaxmat chempionati – bu nafaqat musobaqa va raqobat, balki intellektual o‘sish va tajriba almashish imkoniyatidir. Strategik fikrlash, sabr-toqat va tahliliy qobiliyatlarni rivojlantirishga yordam beradi, bu esa ishimiz sifatiga bevosita ta’sir ko‘rsatadi», – deydi Ulug‘bek Tursoatov.
Shunday qilib, shaxmat energetika sohasining korporativ madaniyatining ajralmas qismiga aylanib bormoqda va xodimlarning professional hamda intellektual ko‘nikmalarini rivojlantirishga xizmat qilmoqda. Chunki tafakkur energiyasi – bu O‘zbekiston gidroenergetikasining muvaffaqiyatli kelajagi garovidir.
