21 aprel - Butunjahon ijodkorlik va innovatsiyalar kuni

Ijodkorlik va innovatsiyalar kuni birinchi marta 2002 yil 21 aprelda nishonlangan. 2017 yil aprel oyida BMT Bosh Assambleyasi ushbu kunni Butunjahon ijodkorlik va innovatsiyalar kuni deb e'lon qildi (World Creativity and Innovation Day). Barqaror rivojlanish dasturida belgilangan maqsadlarga erishish uchun inson faoliyatining turli sohalarida ijodkorlik va innovatsiya imkoniyatlarini ta’kidlagan qaror qabul qilindi.

BMT Ijodkorlik va innovatsiyalar kunini e’lon qilish orqali davlat, hukumat, fan va ta’lim e’tiborini ijodiy tafakkurni rivojlantirish, turli innovatsion g‘oyalarni yaratish va amalga oshirish uchun keng imkoniyat va shart-sharoitlar yaratish zarurligiga qaratishga intiladi.

Ushbu kun sharafiga turli davlatlarda ijodiy va innovatsion faoliyatni rivojlantirishga qaratilgan sa'y-harakatlarning muhimligini ta'kidlash uchun turli mavzudagi tadbirlarni o'tkazish taklif etiladi, chunki bunday tadbirlar mehnat bozorini rivojlantirishga, qashshoqlik va ochlikka qarshi kurashish uchun aholining imkoniyatlarini kengaytirishga turtki berishi mumkin. Bunday tadbirlar davomida keng jamoatchilikka, masalan, yangi ixtirolar yoki ilmiy g'oyalar taqdim etilishi mumkin.

Ijodkorlik nima ekanligining universal ta'rifi yo'q. Bu o’z dunyoqarashining ijodiy ifodasi yoki iqtisodiy va ijtimoiy sohalar yoki barqaror rivojlanish sohasidagi muammolarni hal qilish usuli bo'lishi mumkin. Kreativ iqtisodiyot ham yagona ta'rifga ega emas. Bu inson ijodi va g‘oyalarining intellektual mulk, bilim va texnologiyalar bilan o‘zaro ta’siriga asoslangan rivojlanayotgan tushunchadir. Asosan, bu "ijodiy industriyalar" tayangan bilimga asoslangan iqtisodiy faoliyatdir.

Bugungi kunda loyihalash sohasini o'z ichiga olgan kreativ industriyalar, rivojlanayotgan mamlakatlarga jahon iqtisodiyotining jadal rivojlanayotgan yangi sohalariga kirish uchun yangi imkoniyatlar yaratib, jahon iqtisodiyotining eng dinamik tarmoqlaridan biri hisoblanadi.

XXI asrda aynan innovatsion faoliyat aholi farovonligini oshirish omiliga aylandi. Yuqori texnologiyalarning joriy etilishi butun dunyoda yaxshiroq hayot kechirish uchun sharoit yaratadi. Innovatsiyalar mamlakatlarning iqtisodiy salohiyatini rivojlantirish uchun zarur va mehnat bozorini rivojlantirish, aholi, ayniqsa, ayollar va yoshlar imkoniyatlarini kengaytirishga yordam beradi.