Janubiy Farg‘ona kanalida kichik GES qurilishi yakunlanmoqda
O‘zbekistonning Andijon viloyati Buloqboshi tumanida “JFK-3” kichik GESi qurilishi yakuniga yetmoqda. Janubiy Farg‘ona kanalida barpo etilgan yangi stansiyaning o‘rnatilgan quvvati 6,9 megavattni tashkil etadi. Hozirda obyektda ishga tushirish-sozlash ishlari hamda uskunalar bo‘yicha yakuniy texnik sinovlar o‘tkazilmoqda. Shu bilan birga, quruvchilar hududni obodonlashtirish ishlarini ham nihoyasiga yetkazmoqdalar. Obyekt sanoat ekspluatatsiyasiga topshirishga tayyorlanmoqda.
Obyektning loyihaviy ishlab chiqarish quvvati yiliga qariyb 33 million kilovatt-soatni tashkil etadi. Qo‘shimcha generatsiyaning paydo bo‘lishi mintaqadagi elektr energiyasiga bo‘lgan o‘sib borayotgan talabni mahalliy darajada qoplash hamda magistral tarmoqlar orqali energiya uzatishdagi texnologik yo‘qotishlarni kamaytirish imkonini beradi.
