Toshkent viloyatida yangi yirik energetik loyihaga start berildi.

Toshkent viloyatining Ohangaron tumanida energetika sohasida yana bir yirik investitsiyaviy loyihaning amalga oshirilishiga kirishildi.

Mazkur loyiha mas’uliyati cheklangan “Ahangaran New Energy” jamiyati tomonidan tashabbus qilinib, shamol energetikasi tizimlarini modernizatsiya qilish, shuningdek suv va energiyani tejash texnologiyalarini joriy etishga qaratilgan.

Loyihani joylashtirish uchun “Telyau” mahallasi hududidan 666,2 gektar yer maydoni ajratilgan. Loyiha umumiy qiymati 1,8 milliard AQSh dollariga baholanmoqda va uni bosqichma-bosqich uch yil davomida amalga oshirish rejalashtirilgan.

Birinchi bosqichda har biri 240 megavatt quvvatga ega bo‘lgan ikkita quyosh energiyasi blokini o‘rnatish, shuningdek energiyani saqlash tizimlarini yaratish ko‘zda tutilgan. Keyingi bosqichlarda shamol generatorlari, qo‘shimcha energiya akkumulyatorlari qurilishi, shuningdek gidroenergetika va biomassa uskunalarini joriy etish rejalashtirilgan.

Yaqinda ushbu loyiha doirasida tamal toshini qo‘yish marosimi bo‘lib o‘tdi. Unda soha mutaxassislari, investorlar vakillari, faol fuqarolar va mahalliy aholi ishtirok etdi.

Loyihaning asosiy xorijiy investori – Xitoyning Baibuting korporatsiyasi hisoblanadi. Mazkur kompaniya qurilish, kommunal xizmatlar, foydali qazilmalarni qazib olish, energetika, sanoat, kemasozlik, madaniyat va ommaviy axborot vositalari sohalarida ixtisoslashgan.